Akarere ka Rusizi: Hasojwe ukwezi kwahariwe kuzirikana Ubumwe n’Ubudaheranwa bw’Abanyarwanda

Ku wa 5 Ugushyingo 2026, mu Karere ka Rusizi hasojwe ukwezi kwahariwe kuzirikana Ubumwe n’Ubudaheranwa bw’Abanyarwanda, igikorwa cyasojwe n'ibiganiro byibanze kuri gahunda ya Ndi Umunyarwanda, hagamijwe gukomeza kwimakaza indangagaciro z'ubumwe, gukunda igihugu, ubufatanye n'ubudaheranwa mu Banyarwanda.

Iki gikorwa cyabereye mu cyumba cy'inama cy'Akarere ka Rusizi, kiyobowe Umuyobozi w'Akarere w'Agateganyo , Bwana RWIRIRIZA Fred, cyitabirwa n'abakozi b'Akarere, urubyiruko, abayobozi b'amadini n'amatorero, abagize Inama y'Umutekano yaguye ndetse n'abagize Komite Nyobozi y'Akarere bari basoje manda yabo.

Mu biganiro byatanzwe, hibanzwe ku kamaro ko gukomeza kubaka Ubumwe n'Ubudaheranwa bw'Abanyarwanda, hagaragazwa ko ari indangagaciro z'ingenzi zigomba kuranga buri Munyarwanda mu mibereho ye ya buri munsi, mu mikoranire n'abandi ndetse no mu bikorwa byose bigamije iterambere ry'igihugu.

Abitabiriye basuzumiye hamwe ishyirwa mu bikorwa ry'imyanzuro yafatiwe mu Nama ya Forum yabaye ku wa 24 Ukwakira 2025, harebwa ibyagezweho, imbogamizi zagaragaye n'ingamba zikwiye gufatwa kugira ngo imyanzuro yafashwe ikomeze gushyirwa mu bikorwa mu buryo bufatika. Ibi byagaragaje ko gahunda ya Ndi Umunyarwanda idakwiye kugarukira mu biganiro n'inama gusa, ahubwo igomba guherekezwa n'ibikorwa bifatika bigira uruhare mu gukomeza ubumwe n'iterambere ry'Abanyarwanda.

Ikindi cyagarutsweho ni ugukomeza gushimangira uruhare rwa buri wese mu kubaka igihugu kirangwa n'amahoro, ubwumvikane, ubufatanye n'ubwizerane. By'umwihariko, urubyiruko rwasabwe kugira uruhare rugaragara mu kwimakaza indangagaciro z'ubunyarwanda, kurwanya amacakubiri n'imyumvire isenya ubumwe, no gukoresha neza amahirwe rufite mu guteza imbere igihugu.

Mu rwego rwo kureba uko ibibazo bikigaragara byakemurwa, hanunguranyijwe ibitekerezo ku ngamba zakomeza gufatwa kugira ngo inzitizi zikibangamira ubumwe n'ubudaheranwa zikurweho. Abitabiriye bagaragaje ko buri wese akwiye kugira uruhare mu gukumira imyitwarire n'imikorere bishobora gusubiza inyuma intambwe u Rwanda rumaze gutera mu kubaka igihugu kirangwa n'ubumwe n'iterambere.

Mu butumwa bwatanzwe na Bwana RWIRIRIZA Fred, Umuyobozi w'Akarere w'Agateganyo, yibukije abitabiriye ko Ubumwe n'Ubudaheranwa bitagomba kuba amagambo avugirwa mu nama gusa, ahubwo bigomba kugaragarira mu bikorwa bya buri munsi, mu mikorere, mu miyoborere no mu mibanire y'Abanyarwanda.

Yashimangiye kandi ko buri Munyarwanda afite inshingano zo kurinda ibyagezweho, guharanira ko igihugu gikomeza gutera imbere no kwirinda imyitwarire iyo ari yo yose ishobora kubangamira ubumwe bw'Abanyarwanda. Yasabye kandi abitabiriye kugira uruhare mu guhangana n'amakuru y'ibinyoma akwirakwizwa ku mbuga nkoranyambaga agamije guharabika u Rwanda, bakayasubiza ukuri gushingiye ku bimenyetso bifatika by'ibyo igihugu kimaze kugeraho.

Mu gusoza iki gikorwa, hanashimiwe inzego n'Imirenge byagaragaje uruhare n'umuhate mu gushyira mu bikorwa gahunda n'ingamba zigamije kwimakaza Ubumwe n'Ubudaheranwa bw'Abanyarwanda, hanashimangirwa ko ubufatanye bw'inzego zose ari ingenzi mu gukomeza kugera ku ntego z'iterambere rirambye.

Muri rusange, isozwa ry'ukwezi kwahariwe kuzirikana Ubumwe n'Ubudaheranwa mu Karere ka Rusizi ryabaye umwanya wo kwisuzuma, kungurana ibitekerezo no kongera kwiyemeza gukomeza kubaka igihugu gishingiye ku bumwe, ubwizerane n'ubudaheranwa. Ubutumwa bw'ingenzi bwavuye muri ibi biganiro ni uko kubungabunga ubumwe bw'Abanyarwanda ari inshingano ya buri wese kandi ko bigomba kurangwa n'ibikorwa bifatika bya buri munsi.