Rusizi: Umunsi Mpuzamahanga wa Mwarimu wizihirijwe muri Nyakabuye

Ku wa 5 Ukwakira 2026, mu Karere ka Rusizi hizihijwe Umunsi Mpuzamahanga wa Mwarimu ku rwego rw’Akarere, umuhango wabereye mu Murenge wa Nyakabuye, ukaba waribanze ku ruhare rw’umwarimu mu guteza imbere uburezi no kubaka ahazaza h’igihugu.

Uyu munsi wizihizwa buri mwaka ku itariki ya 5 Ukwakira, ukaba ari umwanya wo gushimira abarimu ku ruhare bagira mu gutanga ubumenyi, kurera no gutoza urubyiruko indangagaciro, ndetse no kubafasha kugira uruhare mu iterambere ry’igihugu.

Mu Karere ka Rusizi, kwizihiza uyu munsi byahurije hamwe abayobozi b’Akarere, abayobozi b’inzego z’uburezi, abarimu, abayobozi b’ibigo by’amashuri,abarezi,  n’abandi bafatanyabikorwa mu burezi. Abitabiriye ibi birori bagarutse ku kamaro k’umwarimu mu kubaka umuryango nyarwanda uha agaciro ubumenyi n’uburere.

Insanganyamatsiko y’uyu mwaka igira iti: “Gushyigikira abarimu: imyaka 60 yo kurengera umwuga w’ubwarimu, kuwuteza imbere no kubaka ahazaza hacu.” Yagaragazaga ko kugira ngo uburezi bugere ku rwego rwifuzwa, bikwiye ko umwarimu ahabwa ubufasha n’uburyo bumufasha gukora neza inshingano ze.

Mu butumwa bwatanzwe muri ibi birori, hagarutswe ku kuba umwarimu ari inkingi y’ingenzi mu burezi, kuko ari we ufasha umwana kubona ubumenyi n’ubushobozi bimufasha mu buzima bwe no mu iterambere ry’igihugu. Umwarimu kandi afite uruhare mu kurera abanyeshuri bafite indangagaciro, ikinyabupfura, gukunda igihugu no kugira uruhare mu gukemura ibibazo bibangamiye iterambere ry’umuryango.

Umuyobozi w’Akarere wungirije ushinzwe iterambere bwana HABIMANA Alfred yasabye abarimu,guhora bongera ubumenyi bityo bagakomeza kuzuza inshingano zabo babigize umwuga, bakarangwa n’ubwitange, ubunyangamugayo, gukunda abanyeshuri no guhora bashaka uburyo bwo kunoza imyigishirize. Basabwe kandi gukomeza kwihugura no gukoresha neza uburyo n’ikoranabuhanga bihari mu rwego rwo guha abanyeshuri uburezi bufite ireme.

Uyu munsi kandi wabaye umwanya wo kureba aho uburezi bugeze mu Karere ka Rusizi, hanagaragazwa uruhare rw’abafatanyabikorwa batandukanye mu kuzamura ireme ryabwo. Ababyeyi n’abaturage muri rusange basabwe gukomeza gufatanya n’amashuri, bakurikirana imyigire y’abana babo kandi bakabafasha kubona ibyangombwa n’umwanya ukwiye wo kwiga.

Umurenge wa Nyakabuye, wabereyemo ibi birori, wagaragajwe kandi nk’umwe mu mirenge iri gukora neza mu burezi. Mu isuzuma ry’imikorere y’uburezi mu Karere ka Rusizi, Nyakabuye yaje ku mwanya wa gatatu, bikaba byashimiwe nk’umusaruro w’imikoranire y’abarimu, abayobozi b’ibigo by’amashuri, abanyeshuri, ababyeyi n’ubuyobozi bw’inzego z’ibanze.

Abitabiriye ibirori bashimangiye ko kuba Nyakabuye yaraje mu myanya y’imbere ari ikimenyetso cy’uko iyo inzego zose zishyize hamwe, uburezi bushobora gutera imbere. Basabwe gukomeza uwo murongo no gushaka izindi ngamba zatuma umusaruro urushaho kuzamuka.

Kwizihiza Umunsi Mpuzamahanga wa Mwarimu mu Karere ka Rusizi byasize ubutumwa bw’uko gushimira no gushyigikira umwarimu bidakwiye kuba ibya rimwe mu mwaka, ahubwo ko bikwiye kuba umuco uhoraho. Umwarimu ufite ubushobozi, ibikoresho n’umwanya mwiza wo gukora, ni we ufasha kubaka umunyeshuri witeguye guhangana n’ibibazo by’ahazaza.

Ibirori by’i Nyakabuye byasojwe hafatwa ingamba zo gukomeza ubufatanye hagati y’abarimu, abayobozi, ababyeyi n’abanyeshuri, hagamijwe kuzamura ireme ry’uburezi no gutegura urubyiruko ruzagira uruhare rufatika mu iterambere ry’Akarere ka Rusizi n’u Rwanda muri rusange.