Muri gahunda yo kwihutisha iterambere hashingiwe  ku gutanga serivisi izana impinduka ku muturage,kuri uyu wa gatandatu tariki ya 27 Nzeri 2025, mu cyumba cy’inama cy’Akarere ka Rusizi, habereye umuhango wo gusinya imihigo 2025-2026 hagati y’Umuyobozi w’Akarere n’Abanyamabanga Nshingwabikorwa b’Imirenge bose hamwe n’Abayobozi b’Amashami y’imirimo ku karere.

Uyu muhango wari ugamije kongerera imbaraga igenamigambi n’ishyirwa mu bikorwa ry’imihigo y’Akarere, hanashyirwaho ingamba nshya zishingiye ku mihigo y’igihugu n’ibikenewe n’abaturage. Buri muyobozi yasinyanye n’Umuyobozi w’Akarere imihigo imbere y’abajyanama mu nama Njyanama y’Akarere.

Umuyobozi w’Akarere,Bwana SINDAYIHEBA Phanuel, yashimangiye ko iyi mihigo igomba gushyirwa mu bikorwa mu buryo bugaragara, kandi ko bizajya bipimwa hagendewe ku musaruro ugerwaho. Yagize ati: “gusinya si ukuzuza impapuro, ni ugufata inshingano. Uyu munsi turimo guhigira abaturage bacu, si ubuyobozi gusa.”

Abayobozi basinye imihigo biyemeje gukorana n’abo bayobora n’abaturage kongera imbaraga mu guharanira iterambere rirambye no gukorera hamwe nk’ikipe imwe besa iyi mihigo basinye ya 2025-2026 bityo hakagaragara impinduka nziza mu iterambere ry’umuturage.