Mu rwego rwo gukomeza kwegera abaturage no kubatega amatwi,ubuyobozi bw’intara y’iburengerazuba n’uturere tuyigize bukomeza gushimangira  inkingi z’imiyoborere y’igihugu aho inkingi y’imiyoborere myiza irimo gukemurira abaturage ibibazo no gushyira umuturage ku isonga

Muri icyo cyerekezo muri gahunda ya “Tujyanemo” na “Muyobozi ca ingando mu bawe” ku wa 19  Mutarama 2024  Guverineri w’Intara y’iburengerazuba Hon DUSHIMIMANA Lambert arikumwe n'abagize inama y'umutekano itaguye y'intara yasuye abaturage b’umurenge wa Bweyeye mu karere ka Rusizi.

Aha mu murenge wa Bweyeye Umuyobozi w’Akarere ka Rusizi Dr KIBIRIGA Anicet yakiriye Guverineri w’Intara y’iburengerazuba hon DUSHIMIMANA Lambert aho yagaragarijwe ishusho y’ubuzima bw’abaturage b’umurenge wa Bweyeye.

Abaturage mu byishimo byinshi bakiranye urugwiro Guverineri n’abari bamuherekeje maze bamugaragariza ibyiza byinshi bagejejweho na perezida wa Repubulika Nyakubahwa Paul KAGAME birimo amashanyarazi,amazi,umuhanda wa kaburimbo Pindura-Bweyeye,ishwagara n’ifumbire ndetse n’izindi gahunda nyinshi bagejejweho.Bati:”mutubwirire nyakubahwa perezida wa repubulika ko dukomeje kumushimira urukundo adahwema kutugaragariza iteka aduhundagazaho ibikorwa bituvana mu bwigunge bikaduteza.

Guverineri DUSHIMIMANA Lambert yabasabye abaturage b’umurenge wa Bweyeye gukomeza kubungabunga umutekano no kwirinda kwambuka imipaka y’igihugu bajya mu cy’abaturanyi kandi abizeza umutekano usesuye.Yanabasabye  gukomeza gushyira mu bikorwa gahunda za Leta uko zakabaye baharanira iterambere ryabo.