Mu rwego rwo guteza imbere ubukungu,ubuzima n’imibereho myiza y’abaturage,ubuyobozi bw’Akarere ka Rusizi  bwashyizeho gahunda ya Tujyanemo aho buri wese yaba umuyobozi,umufatanyabikorwa w’akarere ndetse na buri muturage akora inshingano ze hagamijwe kwihutisha iterambere.

Muri icyo cyerekezo ku wa 11 Mutarama 2023, mu cyumba cy'inama cy'akarere ka Rusizi habereye inama yasuzumiwemo uko akarere gahagaze muri MUSA 2022-2023 no guhemba abesheje uyu muhigo 100% mu mezi 6 ya mbere kugeza ku wa 31/12/2022.

Uyu munsi hahembwe imirenge,utugari,imidugudu ndetse n'abafatanyabikorwa banyuranye.

Umurenge wa Kamembe niwo wabaye uwa 1 ufite 101.4 ukurikirwa n'uwa Nyakarenzo ufite 100.8.

Naho utugari 10 twa mbere ni 1.Karambi yo mu murenge wa Mururu,2.Karangiro,Rusambu,Kabuye na Kanoga zo mu murenge wa Nyakarenzo na Kamurera,Cyangugu,Kamashangi na Gihundwe zo mu murenge wa Kamembe. Muri iyi nama kandi abayobozi b'imidugudu yahize indi mu kwesa vuba umuhigo w'Ubwisungane mu kwivuza ibonye100% yashimiwe mu ruhame ihabwa icyemezo cy'ishimwe. Iyo midugudu ni Pera yo muri Bugarama,Rukohwa yo muri Gihundwe na Banamba yo muri Bweyeye. Muri iyi gahunda nanone abatanyabikorwa mu iterambere b’Akarere ntabwo bibagiranye kuko  abitwaye neza kurusha abanda nabo bashimiwe uruhare rwabo mu gufasha akarere mu nkingi y’ubuzima

Abitabiriye uyu munsi wo gusuzuma uko Akarere kitwaye muri MUSA banyuzwe n'ubufatanye bwaranze Akarere n'ibyiciro byose binyuze muri gahunda ya “Tujyanemo”

Mu magambo y’umunsi yaba umunyamabanga w’Inama Njyanama y’Akarere Madamu UWIMANA Monique, yaba umuyobozi w’Akarere Dr. KIBIRIGA Anicet bashimiye buri wese ku muhate n’ishyaka mu guteza imbere imibereho myiza y’umuturage bihereye kumufasha kugira ubwisungane mu kwivuza byo bimufasha kwivuza igihe bibaye ngombwa bityo agakomeza kwiteza imbere afite amagara mazima.