Ku cyumweru tariki ya 15 Gashyantare 2026 Ku rwego rw’Akarere ka Rusizi , hasojwe ku mugaragaro amarushanwa y’umupira w’amaguru n’indi mikino agamije kwimakaza imiyoborere myiza y’abaturage azwi nka Umurenge Kagame Cup. Iyi mikino yabaye umwanya mwiza wo guhuriza hamwe urubyiruko n’abaturage muri rusange, hagamijwe kubashishikariza gukunda siporo no kuyifata nk’inkingi y’imiyoborere myiza, ubumwe n’iterambere.

Ibirori byo gusoza aya marushanwa byabereye ku kibuga cy’imikino cya Karushaririza mu murenge wa Gihundwe, byitabirwa n’abayobozi b’inzego z’ibanze, abahagarariye inzego z’umutekano, abatoza, abakinnyi ndetse n’abaturage benshi baje kwihera ijisho uko amakipe yahize ayandi yitwaye. Umukino wa nyuma wahuje amakipe  y’umupira w’amaguru y’abagabo abiri yageze ku mukino wanyuma ariyo ikipe y’umurenge wa Nkombo n’iy’umurenge wa Muganza , ukaba warangiye ikipe y’umurenge wa Nkombo itsinze Umurenge wa Muganza ibitego 2/0 ishimangira ko ari yo ya mbere mu karere.

Mu ijambo rye,Umuyobozi w’Akarere SINDAYIHEBA Phanuel yashimiye abitabiriye aya marushanwa, ashimangira ko siporo ari igikoresho cy’ingenzi mu guteza imbere urubyiruko asaba abitabiriye n’urubyiruko kurwanya imyitwarire mibi irimo ibiyobyabwenge n’ubusinzi. Yabasabye nanone kwimakaza umuco w'isuku muri byose n'aho bari hose. Yagize ati: “Siporo ituma urubyiruko rugira ubuzima bwiza, ikabigisha gukorera hamwe no kubaha amategeko. Iyi Kagame Cup ni urubuga rwo kubaka igihugu duhereye mu mirenge. Kandi ikomeza guteza imbere imiyoborere myiza”

Abakinnyi n’abatoza bagaragaje ko aya marushanwa yabahaye amahirwe yo kugaragaza impano zabo no kwigira ku bandi. Umwe mu bakinnyi batsinze yavuze ko bishimiye intsinzi ariko ko ikiruta byose ari ubumwe n’ubusabane byabaranze mu gihe cy’amarushanwa. Yagize ati: “Twize gukina nk’ikipe, twubaha abo duhanganye kandi twishimira ko twahagarariye neza umurenge wacu.

Abaturage bitabiriye imikino nabo bashimye uburyo yateguwe, bavuga ko yabaye umwanya wo kwidagadura no kongera gukundana hagati yabo. Bamwe bagaragaje ko byabafashije kumenya impano ziri mu bana babo no kubashishikariza gukomeza siporo nk’umwuga ushobora kubabyarira umusaruro mu gihe kizaza.

Mu gusoza ibirori, hatanzwe ibihembo birimo imipira, imidari n’ibikombe ku makipe yitwaye neza mu ngeri zose ari mu bagore no mu bagabo haba mu mikino y’amaboko,iy’amaguru ndetse n’igisoro.

Aya marushanwa ya Kagame Cup ku rwego rw’akarere yasojwe mu mwuka w’amahoro n’ibyishimo, agaragaza ko siporo ari inkingi y’iterambere n’ubumwe bw’Abanyarwanda.