Ku wa 23 Nyakanga mu karere ka Rusizi kimwe n’ahandi mu gihugu hatangijwe gahunda y’″intore mu biruhuko″; igamije gukomeza kubungabunga ubuzima bwiza bw’abana n’urubyiruko mu biruhuko,kubarinda ubuzererezi no kubatoza umuco wo gukunda igihugu ndetse n’indangagaciro z’umuco nyarwanda. 

Iyi gahunda yatangirijwe ku rwego rw’akarere mu murenge wa Bugarama ku kigo cy’urwunge rw’amashuri rwa St Paul Muko n’umuyobozi w’Akarere  wungirije ushinzwe imibereho myiza y’abaturage Madamu MUKAKALISA Francine. Ikaba kandi izakorerwa mu masite 93 mu karere hose.

Abana n’urubyiruko bishimiye iyi gahunda yabashyiriweho aho bamwe muri bo bavuze ko bazayungukiramo byinshi bituma barushaho kumenya igihugu cyabo ndetse binabarinda ubuzererezi.

Mu butumwa umuyobozi wungirije ushinzwe imibereho myiza madamu MUKAKALISA Francine yahaye abana n’urubyiruko, yabibukije  ko  bagomba kwitwararika bitwara neza muri ibi biruhuko  kuko aribo bayobozi b'ejo. Yabibukije nanone gukomera ku ndangagaciro z'umuco Nyarwanda abibutsa  ko iyi gahunda ari umwanya mwiza wo kurema ahazaza habo heza

 Yasoje, yongera  gusaba abana n’urubyiruko kuzitabira iyi gahunda aboneraho no gusaba ababyeyi kubigira ibyabo kuko bazayigiramo amasomo atandukanye azabafasha muri ibi biruhuko ndetse no mu buzima busanzwe.