Kuwa 22 Gicurasi 2026,mu karere ka Rusizi  ku kibuga cy’ishuri cya TTC – Mururu  hizihirijwe ku rwego rw’Igihugu umunsi wo gusoza icyumweru cyahariwe uburezi Gatolika mu Rwanda ufite insanganyamatsiko igira iti:”Ndera neza, nkure neza,nkore neza, Igikorwa cyahuriyemo abayobozi mu nzego zitandukanye, abihayimana banyuranye barangajwe imbere na ba Musenyeli 4,abayobozi bo ku rwego rw’Akarere, abarimu, abanyeshuri ndetse n’ababyeyi, bagaruka ku ruhare rw’amashuri Gatolika mu guteza imbere ireme ry’uburezi n’indangagaciro zubaka igihugu.

Ibirori by’uyu munsi byabimburiwe na Misa yatuwe na Musenyeli HAKIZIMANA Celestin.Mu butumwa bwatangiwe muri uwo muhango,bwagarutse ku guha umwana uburere bukwiye uhereye mu muryango no mashuri  bityo umwana agakura neza yahawe ibyankenerwa byose maze akaba yabonye umusingi wo gutuma akora neza. 

Mu butumwa bunyuranye bwashimiye kiliziya Gatolika uruhare rwayo mu burezi bw’u Rwanda, yibutsa ko  amashuri ya kiliziya gatolika mu Rwanda atanga uburezi budashingira gusa ku bumenyi busanzwe, ahubwo bunita ku kubaka umuntu wuzuye urangwa n’indangagaciro zirimo gukunda igihugu, umurimo unoze, ubufatanye n’ubupfura.

Umuyobozi bw’Akarere ka Rusizi Wungirije ushinzwe Imibereho myiza madamu MUKAKALISA Francine yashimiye Kiliziya Gatolika ku ruhare rwayo mu iterambere ry’uburezi bw’u Rwanda muri rusange no muri aka karere by’umwihariko. Yavuze ko amashuri Gatolika yagize uruhare rukomeye mu kurera abantu benshi bafite uruhare mu iterambere ry’igihugu. Yibukije kandi ko Leta y’u Rwanda ikomeje gukorana neza n’amadini n’amatorero mu rwego rwo guteza imbere uburezi bufite ireme kandi bugera kuri bose.”

Musenyeli NTAGUNGIRA Jean Bosco wa Diyosezi Gatolika ya Butare ushinzwe uburezi mu nama nkuru y’abepiskopi Gatolika mu Rwanda yavuze ko icyumweru cy’uburezi Gatolika ari umwanya mwiza wo gusuzuma aho uburezi bugeze, ibibazo bihari n’ingamba zo gukomeza kuzamura ireme ryabwo. Ashimangira ko Kiliziya Gatolika ikomeje gushishikazwa no kurera umwana ushobotse n’uburere bumufasha gushobokera igihugu. Bityo asaba buri wese ahereye ku babyeyi gukomeza guharanira kurera abana neza na cyane ko umuryango ariwo gicumbi muzi cy’uburere bukwiye.Yagize ati: “Uburezi Gatolika bugamije kurema umuntu ufite ubumenyi, ariko unafite umutima w’ubumuntu. 

Abitabiriye uwo muhango bagarutse kandi ku ruhare rw’ababyeyi mu burezi bw’abana babo, basabwa gukomeza gukorana bya hafi n’ibigo by’amashuri mu gukurikirana imyitwarire n’imitsindire y’abana. Bavuze ko uburezi bufite ireme budashoboka hatabayeho ubufatanye bw’inzego zose zirimo amashuri, ababyeyi, Kiliziya ndetse n’inzego za Leta.

Abanyeshuri bitabiriye ibyo birori nabo bagaragaje ko bishimira kwiga mu mashuri yubakiye ku ndangagaciro za gikirisitu, bavuga ko bibafasha kugira imyitwarire myiza no kurangwa n’ikinyabupfura. Muri birori ibigo bya Kiliziya Gatolika byatsindishije neza mu mwaka 2024-2025 byahawe ibihembo kubera kwitwara neza no gutsindisha neza.

Mu rwego rwo kurushaho kunezeza abari bitabiriye uwo muhango, hanabayeho ibikorwa bitandukanye birimo , imbyino n’ikinamico byateguwe n’abanyeshuri bo mu bigo bitandukanye bya Kiliziya Gatolika. Ibyo bikorwa byagarukaga ku nsanganyamatsiko y’uburezi buboneye ndetse n’uruhare rw’urubyiruko mu kubaka igihugu gifite amahoro n’iterambere rirambye.