Kuri uyu wa Gatatu tariki 13 Kanama, 2025 mu Murenge wa Bugarama, Akarere ka Rusizi ni ho hizihirijwe Umunsi Mpuzamahanga w’Urubyiruko ku rwego rw’igihugu, ufite insanganyamatsiko igira iti: “Kubaka Ubushobozi bw’Urubyiruko hagamijwe Iterambere Rirambye.”

Uyu munsi witabiriwe na Minisitiri w’Urubyiruko n’Iterambere ry’Ubuhanzi, Bwana Utumatwishima Jean Nepo Abdallah, ari kumwe na Guverineri w’Intara y’Iburengerazuba, Bwana Ntibitura Jean Bosco, Umuyobozi w’Akarere ka Rusizi, Bwana Sindayiheba Phanuel, ndetse n’itsinda ry’abafatanyabikorwa batandukanye ba Minisiteri y’Urubyiruko n’Iterambere ry’Ubuhanzi.

Ibikorwa byaranze uwo munsi

Mu bikorwa byabimburiye ibirori, abayobozi basuye urubyiruko ruri muri gahunda yo “Kwita ku rubyiruko mu biruhuko” ku kigo cya Saint Paul Muko. Mu birori byabereye ku kibuga cya Pera mu Bugarama, urubyiruko rweretse abitabiriye impano zabo zitandukanye zirimo indirimbo, imbyino, n’ubundi buhanzi.

Ubutumwa bwatanzwe

• Mu ijambo rye, Guverineri w’Intara y’Iburengerazuba yashimye uruhare rw’urubyiruko mu iterambere ry’igihugu, abibutsa ko bafite amahirwe yo kuba abahindura igihugu cyabo.
• Minisitiri w’Urubyiruko n’Iterambere ry’Ubuhanzi, nk’umushyitsi mukuru, yasabye urubyiruko gukomeza kugira indangagaciro z’umuco nyarwanda, kudapfusha ubusa amahirwe bahabwa kugira ngo babashe kubaka ejo hazaza h’ Igihugu gifite iterambere rirambye.

Umunsi wagenze neza

Ibirori byaranzwe n’ubwitabire n’umunezero ku rubyiruko ndetse n’abaturage muri rusange. Abahanzi bakomoka mu Karere ka Rusizi, hamwe n’Umuhanzikazi Bwiza n’Umubyinnyi TITI Brown n’itsinda rye bifatanyije n’urubyiruko mu gushimisha abitabiriye.