Kuwa 23 Nzeri  2025 mu cyumba cya centre de Pastoral Incuti   mu karere ka Rusizi habereye ibiganiro ku ruhare rw'urubyiruko mu kwimakaza ubumwe n'ubudaheranwa bw'abanyarwanda byateguwe na Minisiteri y'ubumwe bw'abanyarwanda n'inshingano mboneragihugu ku bufatanye n'umuryango Vision Jeunesse Nouvelle.Ibi biganiro byari bifite intero igira iti:Rubyiruko menya amateka yawe, byahuje urubyiruko  rusaga 300 rw'ibyiciro byihariye rwo mu turere twa Karongi,Nyamagabe na Rusizi.

Ibi biganiro byitabiriwe na Minisitiri Dr BIZIMANA Jean Damascène wa Minisiteri y’ubumwe bw’abanyarwanda n’inshingano mboneragihugu byahuje urubyiruko rurimo abahoze mu mitwe yitwara gisirikari,abamotari n'abanyonzi,abakora ubucuruzi buciriritse bwambukiranya imipaka,abakora ubukorikori,abakora uburobyi n'abakora mu byayi.

Mu kiganiro ku mateka Minisitiri Dr.Damascene yasabye urubyiruko kwihatira gusobanukirwa  n'amateka y’Igihugu cyabo,birinda ibibi,bashyira imbaraga mu byimakaza ubumwe n’ubudaheranwa bw’Abanyarwanda. Yabasabye kurwanya abagoreka amateka y'u Rwanda ku mbuga nkoranyambaga.Yabasabye gufata iya mbere mu kunyomoza abagoreka amateka y'uRwanda, barwanya imvugo zibiba urwango,amacakubiri, ipfobya n'ihakana rya Jenoside yakorewe Abatutsi.

Uru rubyiruko rwanyuzwe n’ibi biganiro rwiyemeza gukomeza gusigasira ubumwe bw’abanyarwanda no gushyira imbaraga hamwe mu kurwanya uwo ariwe wese washaka kugarura amacakubiri mu banyarwanda n’aho yaba ari hose.