Mu Karere ka Rusizi, ku bufatanye n’Urwego rwa Polisi y’Igihugu, kuwa 20 na 21 Mutarama 2026 hakozwe ubukangurambaga bw’iminsi ibiri bugamije gukomeza gushimangira umutekano wo mu muhanda binyuze muri gahunda ya “Turindane Tugereyo Amahoro”. Ubu bukangurambaga bwitabiriwe n’ibyiciro binyuranye by’abakoresha umuhanda harimo abaturage bagenda n’amaguru,abatwara ibinyabiziga barimo abatwara amagare,abatwara moto,abatwara imodoka zitwara abagenzi,abatwara amakamyo ndetse n’abayobozi batandukanye.

Ku itariki ya 20 Mutarama bwakorewe mu murenge wa Muganza  ku kibuga cya Cimerwa bugenewe abakoresha umuhanda batuye mu kibaya cya Bugarama. Naho ku wa 21 Mutarama 2026 bwakorewe mu murenge wa Kamembe, bugenewe abakoresha umuhanda bo mu mujyi wa rusizi n’inkengero zawo.

Umushyitsi mukuru muri iki gikorwa yari Guverineri w’Intara y’iburengerazuba Bwana NTIBITURA Jean Bosco,ndetse n’umuyobozi mukuru  wa Polisi y’Igihugu ku rwego rw’Igihugu.Abayobozi bose bashimangiye ko umutekano mu muhanda ugomba kugirwamo uruhare na buri wese.

Mu ijambo ry’ikaze Umuyobozi w’Akarere ka Rusizi bwana SINDAYIHEBA Phanuel yibukije abakoresha umuhanda b’ingeri zose ko umutekano wa mbere igihugu cyitaho ari uw’umuturage bityo rero ko iyi gahunda ya turindane tugereyo amahoro iri muri gahunda ya leta yo gukomeza gusigasira ubuzima bw’umuturage.Ashimira kandi ubuyobozi bukuru bwa polisi y’igihugu kuri iyi gahunda ije gukomeza kubungabunga umutekano wa buri wese ukoresha umuhanda.

Guverineri w’Intara yasabye buri wese ukoresha umuhanda kwirinda kuwugendamo nk’uwawuranguye kuko umuhanda ari uwa buri wese.Buri wese akirinda kugenda mu muhanda nk’aho nta wundi ukeneye kuwukoresha cyangwa uwurimo. Ati: “buri wese agomba kumenya ko uburenganzira bwe burangirira aho ubw’undi butangirira. Yagize ati: “Gahunda ya Turindane Tugereyo Amahoro ishingiye ku bufatanye; buri muturage agomba kumva ko umutekano wo mu muhanda atari uw’umwe gusa ari nayo mpamvu y’ubu bukangurambaga ngo buri wese yumve inshingano afite ku mutekano wo mu muhanda.”

Umuyobozi wa Polisi y’Igihugu ku rwego rw’Igihugu CG Felix NAMUHORANYE yasabye abagenda n’amaguru kwirinda kwambukiranya umuhanda bavugira kuri telefoni,akomeza gusaba abatwara ibinyabiziga gutwara banyoye ibisindisha yibutsa abantu ko umuhanda ari uwa buri wese. Ati: “nta n’umwe umutekano wo mu muhanda utareba”.Bityo rero turindane tugereyo amahoro.

Abaturage bagaragaje ko ubu bukangurambaga bwabongereye ubumenyi n’ubushake bwo gukomeza kwita ku mutekano wo mu muhanda, biyemeza gushyira mu bikorwa inyigisho bahawe.

Ubukangurambaga bw’iminsi ibiri bwasojwe hasabwa abaturage b’Akarere ka Rusizi gukomeza kwitandukanya n’ibishobora guhungabanya umutekano wo mu muhanda, hagamijwe kubungabunga ubuzima bw’abawukoresha binyuze muri gahunda ya “Turindane Tugereyo Amahoro.”